आवाज कोकणचा  / प्रतिनिधी 

नवी मुंबई दि. २९ ऑक्टोबर २२

पत्रकार उत्कर्ष समितीने केला रांगोळी कलाकारांचा सन्मान

रंगवल्ली कला दर्शनचे प्रमुख श्री. नंदकुमार साळवी यांच्या प्रमुख मार्गदर्शनाखाली एन. आय . हायस्कूल उरण येथे भव्य रांगोळी प्रदर्शनाचे आयोजन केले असून ते ३१ ऑक्टोबर पर्यंत चालणार आहे. 


या रांगोळी प्रदर्शनामध्ये उरण तालुक्यातील विविध कलाकारांनी सहभाग नोंदवला असून अतिशय सुबक आणि जिवंत वाटाव्यात अशा रांगोळ्या साकारल्या आहेत.  प्रामुख्याने नंदकुमार साळवी यांनी साकारलेला श्रीगणेश , सत्या कडू यांचा साईबाबा व स्वप्नाली मंचेकर आणि नवनीत पाटील यांनी साकारलेले श्री छत्रपती शिवाजी महाराज या रांगोळ्या वास्तवात  जिवंत भासणाऱ्या असून लक्षवेधी आहेत. 


पत्रकार उत्कर्ष समितीचे अध्यक्ष डॉ. अशोक म्हात्रे यांनी आज आपले सहकारी सचिव डॉ. वैभव पाटील, उरण तालुका सदस्या पूजा चव्हाण, महिला उत्कर्ष समिती रायगड अध्यक्ष रेखा घरत,  उरण तालुका अध्यक्षा निर्मला पाटील यांच्यासह प्रदर्शनास भेट देऊन आनंद लुटला.  

या वेळीं नंदकुमार साळवी, सिद्धार्थ नागवेकर, सत्या कडू , नवनित पाटील, दर्शन पाटील, स्वप्नाली मणचेकर, निलेश मेस्त्री, संतोष डांगरे, राजेश नागवेकर, किर्तिराज म्हात्रे, संतोष पाटील या  कलाकारांना सन्मानपत्र देऊन गौरव केला. या कार्यक्रमासाठी उरण येथील सामाजिक कार्यकर्ते श्री संतोष पवार यांचे मोलाचे सहकार्य लाभले. 


यावेळी बोलताना नंदकुमार साळवी यांनी रांगोळीचे आपल्या आयुष्यात व एकूणच मानवी  जीवनावर होणारे अध्यात्मिक व सकारात्मक परिणाम याचे महत्त्व सांगितले . युवा पिढीने केवळ तांत्रीक युगातील साधनांचा अतिवापर करण्यापेक्षा आपली संस्कृती जपण्यासाठी  या कलेकडे वळून आपला हा गौरवशाली वारसा पुढे नेण्यासाठी प्रयत्न करावा असे सांगितले. 


लवकरच नवी मुंबईमध्ये वेगवेगळ्या माध्यमातून माफक दरात याचे प्रशिक्षण वर्ग सुरू करणार असल्याचेही त्यांनी सांगितले त्यांच्या या कार्यास पत्रकार उत्कर्ष समितीही आपला खारीचा वाटा उचलणार आहे. 






Comments

Popular posts from this blog