आवाज कोकणचा / लोणावळा

श्री एकवीरा पालखी मंडळांची नियोजन बैठक लोणावळा पोलीस ठाणे येथे संपन् श्री जयेंद्र दादा खुणे यांची प्रमूख उपस्थिती....

  लोणावळा (प्रतिनिधी) : श्री एकविरा देवस्थान ट्रस्ट वेहेरगाव आयोजित चैत्र सप्तमी सोमवार दि.१५ एप्रिल २०२४ रोजी या मुख्य दिवशी कार्ला गडावर होणाऱ्या आई श्री एकवीरा देवी पालखी सोहळ्याचा मुख्य दिवस असून दि. १४ ते १६ एप्रिल या दरम्यान देवीची यात्रा आहे. यात्रेला आगरी, कोळी, कराडी, कुणबी, सी.के.पी. व इतर समाजातील लाखो भक्त व भाविक दर्शनासाठी येतात. पालखी व यात्रेचे औचित्यसाधून मुंबई, नवी मुंबई, रायगड, ठाणे, पालघर जिल्ह्यातील सर्व एकविरा पालखी मंडळे व मंडळाचे प्रमुख यांची लोणावळा ग्रामीण पोलीस ठाणे यांनी बैठकीचे आयोजन केले होते.

 नियोजन बैठक लोणावळा ग्रामीण पोलीस ठाण्याचे वरिष्ठ पोलीस निरीक्षक श्री. किशोर धुमाळ साहेब यांच्या अध्यक्षतेखाली रविवार दि. ७ एप्रिल २०२४ रोजी लोणावळा ग्रामीण पोलीस ठाणे येथे बैठक संपन्न झाली. एकविरा भक्त श्री .जयेंद्रदादा खुणे यांनी श्री. किशोर धुमाळ साहेब ( वपोनी) यांचा सर्वांच्यावतीने पुष्पगुच्छ देऊन सत्कार केला.

                  यंदा प्रथमच सर्व एकविरा पालख्यांच्या प्रमुखांना एकत्र आणण्याचे काम एकवीरा भक्त जयेंद्रदादा खुणे (अध्यक्ष मुंबई प्रदेश, आगरी सेना ) यांनी केले. यावेळी उपस्थित मान्यवर श्री.सुरेंद्रदादा पाटील (उद्योजक) , छावा क्रांतिवीर सेना रायगड जिल्हा अध्यक्ष श्री. रोशनदादा पवार, कोळी समाजाचे श्री.चंदू पाटील, आई एकविरा देवी भक्त मंडळ अलिबाग अध्यक्ष विशाल डवळे व इतर उपस्थित होते. सदर नियोजन बैठकीमध्ये गडावर होणाऱ्या पालखी सोहळा व यात्रेनिमित्त मा. जिल्हाधिकारी(पुणे) यांच्या आदेशानुसार मा. तहसीलदार (मावळ), लोणावळा ग्रामीण पोलीस ठाणे यांनी बनवलेल्या नियम व अटी याबाबत श्री. किशोर धुमाळ साहेब यांनी उपस्थितांना समजून सांगितले.

      गडावर शोभेची दारू व फटाके वाजवण्यास बंदी करण्यात आलेली आहे, येणाऱ्या सर्व पालखी मंडळांनी दुपारी एक वाजण्याच्या अगोदर येणे आवश्यक आहे. सर्व पालख्या मंडळांची विशेष दर्शनाची व्यवस्था करण्यात आलेली आहे. गडावर कचरा, घाण करू नये व स्वच्छता राखावी, तसेच भांडण, तंटा, वाद, होऊन शांतता भंग होऊन कायदा व सुव्यवस्थेचा प्रश्न निर्माण होईल असे कृत्य करू नये. पालखी सोहळ्याला व आईचे दर्शन घेणाऱ्या सर्व भक्तांनी शिस्तबद्ध पद्धतीने व शांततेत दर्शन घ्यावे. पायथा ते एकविरा गडावर विविध ठिकाणी पोलीस बंदोबस्त तैनात करण्यात येणार आहेत. भक्तांनी पोलीस व स्वयंसेवक यांना सहकार्य करावे. श्री एकविरा देवस्थान ट्रस्ट विश्वस्त व कर्मचारी यांच्याशी कोणत्याही प्रकारचे वाद घालू नये तसेच हुल्लडबाजी करून इतर भाविकांना व नागरिकांना त्रास होणार नाही याची दक्षता घ्यावी. मोठ्या गाड्यांच्या पार्किंगची व्यवस्था अग्रसेन हॉटेलच्या बाजूला करण्यात आलेली आहे.या अटी व नियमांचे सर्व पालखी प्रमुखांनी स्वागत करून सहकार्य करण्याचे व पालखी सोहळा आनंदात व उत्साहात त्याचप्रमाणे पारंपारिक पद्धतीने केला जाईल अशी जबाबदारी पालखी प्रमुखांनी स्वीकारली.

              श्री. जयेंद्रदादा खुणे यांनी सर्वांचे स्वागत करून आभार मानले व अशाप्रकारे खेळीमेळीच्या वातावरणात नियोजन बैठक संपन्न झाली.