आवाज कोकणचा / नवी मुंबई 

उरण नगरपरिषद निवडणूक : दुबार मतदारांच्या खेळाचा स्फोटक आरोप; “हा डाव आम्ही उधळून लावूच”—भावना घाणेकर

उरण प्रतिनिधी/ पूजा चव्हाण

उरणच्या राजकारणात निवडणुकीच्या पार्श्वभूमीवर तुफान गतीने वाढणाऱ्या आरोप-प्रत्यारोपांमध्ये आज मोठा राजकीय स्फोट झाला. नगराध्यक्ष पदाच्या उमेदवार भावना घाणेकर यांनी सजलेल्या पत्रकार परिषदेत सत्ताधारी आणि काही सरकारी कर्मचाऱ्यांवर थेट बोट ठेवत दुबार मतदारांच्या कथित रचनेचा पर्दाफाश केला. “मतदारांची चोरी आणि लोकशाहीचे अपहरण करण्याचा हा प्रयत्न आम्ही सहन करणार नाही. पुरावे आमच्याकडे आहेत—कॉल रेकॉर्ड्स, स्क्रीनशॉट्स आणि प्रत्यक्ष संभाषणे. येत्या अधिवेशनात हा संपूर्ण खेळ उघडा करणारे आहोत,” असा ठाम इशारा त्यांनी दिला.

घाणेकर म्हणाल्या की, “उरणचे आमदार स्वतः ५००० मतांनी निवडून आले, हे मान्य. पण त्यांनी ४००० मतांनी नगराध्यक्ष निवडून आणण्याचा जीभेला काटा बसणारा दावा करताना मतचोरीच्या आधारावर आत्मविश्वास मिळाला आहे का? हा आमचा सरळ आरोप आहे.”

मतदारयादीत मोठ्या प्रमाणात अनियमितता

पत्रकार परिषदेत मांडलेल्या आकडेवारीने उपस्थितांचे लक्ष वेधून घेतले.

४२१० मतदारांचा पत्ता मतदारयादीत नाही

१५१६ दुबार मतदार आढळले.

तक्रार असूनही निवडणूक आयोगाने या अनियमिततेकडे दुर्लक्ष केल्याचा आरोप त्यांनी केला.

भावना घाणेकर म्हणाल्या, “लोकशाही पवित्र असते, परंतु काही जणांनी ती मातीमोल केली आहे. सत्ताधारी आणि त्यांच्याशी हातमिळवणी केलेले काही सरकारी कर्मचारी मतदारांची नावे कृत्रिमपणे वाढवणे, फेक आयडी तयार करणे अशा प्रकारच्या खेळी करताना आढळले आहेत. इतकंच नव्हे तर आमदार स्वतः लोकांना सांगतात—‘फेक आयडी देतो, फक्त सकाळी रिकाम्या बूथवर मतदान करून या.’

“आम्ही शांत बसणाऱ्यातले नाही”

भावनांनी स्पष्ट शब्दांत सांगितले की, “निवडणूक पारदर्शक व्हावी ही आमची प्राथमिक भूमिका आहे. पण जर गैरप्रकाराचा टक्का वाढत गेला तर आम्हीही सडेतोड उत्तर देऊ. ही निवडणूक लोकशाहीची परीक्षा आहे.”

थोर नेत्यांची उपस्थिती आणि जाहीरनाम्याचे प्रकाशन

पत्रकार परिषदेला माजी आमदार मनोहरशेठ भोईर, गटनेते गणेश शिंदे, सामाजिक कार्यकर्ते गोपाळ पाटील, काँग्रेसचे ज्येष्ठ नेते मिलिंद पाडगावकर, मनसेचे युवा नेते सतीश पाटील यांसह महाविकास आघाडीचे अनेक मान्यवर उपस्थित होते.

यावेळी महाविकास आघाडीचा जाहीरनामा देखील प्रकाशित करण्यात आला.

जाहीरनाम्यात—

आरोग्यविषयक सुविधा,

शिक्षण आणि कला-क्रीडा विकास,

सांस्कृतिक आणि धार्मिक उपक्रमांना चालना,

रोजगार निर्मिती मूलभूत नागरी सेवांचे सुदृढीकरण या सारख्या विषयांवरील ठोस योजना जाहीर करण्यात आल्या.

भावना घाणेकर यांच्या आरोपांमुळे उरणच्या राजकीय वातावरणात खळबळ उडाली असून आगामी दिवसांत या प्रकरणाला नवे वळण मिळण्याची शक्यता व्यक्त केली जात आहे.