आवाज कोकणचा / नवी मुंबई

उरण नगरपरिषद निवडणूक : शिवसेना महायुतीच्या प्रचारसभेत सत्ताधाऱ्यांच्या “खोट्या विकासा”वर जोरदार हल्लाबोल...

पूजा चव्हाण उरण

उरण—नगरपरिषद निवडणूक जवळ येत असताना राजकीय तापमान चांगलेच वाढले असून गुरुवार, २७ नोव्हेंबर रोजी गणपती चौकातील श्रीराम मंदिर सभागृहात झालेल्या शिवसेना महायुतीच्या प्रचारसभेत सत्ताधारी पक्षाच्या “खोट्या व भकास विकासा”वर तुफान टीकेची झोड उठली. नगराध्यक्ष पदाच्या उमेदवार रूपाली तुषार ठाकूर यांनी उरणमधील विकासकामांचे आकडे, वचने, आश्वासने आणि वास्तव यांची सुस्पष्ट तुलना करत सत्ताधाऱ्यांच्या कारभाराची चिरफाड केली.

सभेला उपस्थित राहून खासदार श्रीरंग बारणे यांनी जनतेला २ डिसेंबर रोजी धनुष्यबाणाचे बटण दाबून शिवसेना महायुतीच्या सर्व उमेदवारांना विजयी करण्याचे जोरदार आवाहन केले. “निवडणूक ही चांगले आणि वाईट काम यातील फरक दाखवण्याचं माध्यम आहे. आम्ही वैर ठेवत नाही, पण भ्रष्टाचार आणि खोट्या विकासाला मूक संमतीही देत नाही,” अशा शब्दांत त्यांनी सत्ताधाऱ्यांच्या कारभाराचा समाचार घेतला.

महायुतीकडून नगराध्यक्ष पदासाठी रूपाली ठाकूर तर नगरसेवक पदासाठी प्रभाग १-ब येथून अनंत मधुकर कोळी, प्रभाग ३-ब मधून तुषार शंकर ठाकूर, प्रभाग ४ मधून हंसराज महादेव चव्हाण तर प्रभाग ७-ब मधून अशमिल मोहम्मद अली मुकरी हे उमेदवार मैदानात आहेत.

व्यासपीठावर खासदार श्रीरंग बारणे यांच्यासह शिवसेनेचे सचिव राहुल लोंढे, जिल्हाध्यक्ष अतुल भगत, संपर्कप्रमुख रमेश म्हात्रे, संघटक मेघा दमडे, वैजयंती ठाकूर, युवा सेना जिल्हा संघटक प्रीतम सुर्वे, तसेच तालुकाप्रमुख दीपक ठाकूर आदी मान्यवर उपस्थित होते.

अतुल भगत यांनी आक्रमक पद्धतीने सत्ताधारी भाजपवर टीकेचे बाण सोडले. “सहा हजार कोटींचा विकास सांगतात; पण रस्ते, पाणी, स्वच्छता—याचा पत्ता नाही. २१व्या शतकातही उरणला मूलभूत सुविधा नाहीत, तरीही विकासाची गर्जना?”, असा थेट सवाल त्यांनी उपस्थित केला.

तालुकाप्रमुख दीपक ठाकूर यांनी भाजप व आमदार महेश बालदी यांनी शिवसेना व खासदार बारणे यांच्यावर केलेल्या टिकेवर उत्तर देताना, “आमच्या नेत्यांवर टीका केली तर आम्ही आरेला कारे करण्याची ताकद ठेवतो,” असा कडक इशारा दिला.

नगराध्यक्ष पदाच्या उमेदवार रूपाली ठाकर यांनी २०१७ च्या भाजपच्या जाहीरनाम्यातील आश्वासने, अपूर्ण कामे, विकासकामांतील आर्थिक तफावत यावर बोट ठेवत उरणच्या समस्यांचे वस्तुनिष्ठ विश्लेषण केले. “वीस वर्षे सत्ता असूनही स्वच्छता, स्वच्छतागृहे, डम्पिंग ग्राउंड, रस्ते–यांचे प्रश्न कायम का? पैसा आला पण काम कुठे गेले?” असा थेट प्रश्न त्यांनी उपस्थित करत जनतेसमोर विकासाच्या नावाखालील गोंधळाचे पडसाद उमटवले.

सत्ताधाऱ्यांच्या “खोट्या विकासा”विरुद्ध आणि वास्तविक कार्याच्या बाजूने उरणच्या मतदारांनी उभे राहावे, तसेच सर्व उमेदवारांना भरघोस मतांनी निवडून द्यावे, असे आवाहन सभेतून करण्यात आले.